Zamjenik ministra spoljnih poslova Kosova Valon Murtezaj izjavio je da još nije poznat datum podnošenja zahtjeva za učlanjenje u Unesko i Savijet Evrope.
“Radimo na unapređenju dokumentacije, radi se o nizu strateških dokumenata i zakona. Ali, u ovom trenutku, ne mogu da kažem da ćemo da apliciramo sada ili nekom drugom prilikom, jer mnoge okolnosti određuju donošenje takve odluke”, kazao je Murtezaj za Slobodnu Evropu.
Prema njegovim riječima, članstvo u međunarodnim organizacijama za Kosovo je jedan od prioriteta Ministarstva spoljnih poslova ali i svih ostalih kosovskih institucija.
On je rekao da su u “narednom dužem vremenskom periodu” za Kosovo, pored Uneska, prioritet i Interpol i Savijet Evrope.
Prilikom donošenja odluke o podnošenju zahtjeva za prijem u članstvo u UNESKO, institucije Kosova, prije svega Ministarstvo spoljnih poslova, rade i na unapređenju dosijea za apliciranje, rekao je Murtezaj.
“Moram, međutim, da razjasnim da mi još nemamo konačnu odluku kada ćemo da apliciramo. Mnoge okolnosti trebaju da se analiziraju, dešavanja unutar Unesko, dešavanja na Kosovu, u regionu, i sve to utiče na proces. Prema tome, moramo da budemo pažljivi da se ne ponovi neuspjeh. Moramo da imamo sigurne šanse da ćemo se učlaniti”, rekao je on.
Murtezaj je naveo da će i nakon što bude podnijet zahtjev za članstvo u Savijet Evrope, taj proces potrajati.
“Moramo reći da je nesretna okolnost to destruktivno ponašanje Vlade Srbije u tom pravcu. Članstvom Kosova u međunarodnim organizacijama ne gubi Srbija. Međutim, koliko god ti destruktivni napori trajali, Srbija ne može da spriječi put Kosova na tom putu. Niti ima snagu, niti ima legitimitet i kredibilitet da tako nešto uradi”, kaže Murtezaj.
Prema njegovim riječima, članstvo Kosova u međunarodnim organizacijama je u interesu svih – i samog naroda na Kosovu, ali i država sa kojima se Kosovo graniči.
